Unibertsitateen Gida eguneratu du Eroski Consumerek bere webgunean

Heidi OTADUY

Eroski Consumerek Unibertsitateen Gida praktikoa eguneratu du, aurtengo datuak bildu ondoren. Bertan, unibertsitate bakoitzaren ezaugarriak agertzeaz gain, bakoitzak eskaintzen dituen titulazio eta master ofizialei buruzko xehetasunak jakiteko baliagarria den informazioa ikus daiteke. Hala nola, matrikularen prezioa, gutxieneko nota, leku kopurua, ordenagailu aukera edota irakasle taldea.

            Aurtengo Gida praktikoan Espainian dauden 76 unibertsitateei buruzko informazioa eskaintzen dute; guztira, 3002 gradu titulu eta 2564 master ofizial aztertu dituzte. Aurtengo Gidan adierazten denez, Euskal Herriko Unibertsitateak (EHU) eskaintzen ditu master ofizial gehien. Gainera, Espainiako unibertsitate-sistema aintzat hartuz, euskal unibertsitateak dira masifikazio gutxien daukatenak. Hau da, ratioak aztertuz, irakasle bakoitzeko ikasle gutxien dituztenak (8,9 ikasle irakasle bakoitzeko).

Espainiako autonomia erkidegoak aztertuz gero, ordea, Katalunia, Madril eta Andaluzia kokatzen dira master ofizialetan eskaintza ugarien dituzten lekuak bezala.

Euskal unibertsitateen arteko estatistikei erreparatuz gero, EHUk eta Nafarroako Unibertsitateak (UNAV) dauzkatela ikerkuntza-jardun oparoenak nabarmendu daiteke. 

2011. urtean euskal unibertsitateetan defendatu ziren 572 doktore-tesietatik, EHUn 321 egin dira, eta Nafarroako unibertsitatean, 182.

            Ikerketa bereziagoak ere egin dituzte Eroski Consumerek aurten argitaratu duen gidan. Adibidez, unibertsitateek ikasle bakoitzeko zenbat ordenagailu dituzten aztertu dute. Kasu horretan, Deustuko Unibertsitatea eta Mondragon Unibertsitatea, EHU edo UNAV baino egoera hobean daude, ordenagailu bat eskaintzen baitute hiru ikasle bakoitzeko.

            Azpimarragarria den beste datu bat, Mondragon Unibertsitateak enpresa arloarekin daukan lotura da. 3.018 ikasle izanik, 600 enpresarekin ditu ikastaldi-hitzarmenak.

Europako esparrura egokitutako 200 gradu baino gehiago eskaintzen dituzte bost euskal unibertsitateek. Aipatzekoa da, haietako 92 Euskal Herriko Unibertsitateak eskaintzen dituela, gehien eskaintzen dituena izanik.

            Gida Praktiko hau berritu dutela aprobetxatuz, unibertsitatean ikasten hasteko asmoa baduzu, edota unibertsitatez aldatu nahi baduzu, www.universidades.consumer.es webgunean aurkituko dituzu zure erabakia hartzeko garrantzitsuak izan daitezkeen datu zehatzagoak.

Leioako Arte Ederren Fakultateko zabalkuntzaren obrek hasi dute bigarren fasea dagoeneko

Xabier ORMAZABAL

 

Leioako ArteEderren Fakultatearen zabalkuntza epeen barruan doa eta hasi berria du instalazio fasea. Gaizka Barron lan arduradunak esan duenez, zementazio eta estruktura lanak bukatuak daude eta azaroa bitarte ekipamenduen instalazioan jardungo dira.

Ia 4 milioi €-ko aurrekontua duen berrikuntza hau abenduan bukatzea espero da, kurtsoaren bigarren lauhilekoan erabilgarri izanez. Teknologia puntako ekipazioa izango du: robotika gela bat, zazpi errestaurazio tailer, 3 plato, bi balio anitzeko areto, erreprografia gelak, errebelazio kimikoko gelak eta abar.

Iñaki Arrieta arkitektoak diseinatutako eraikuntza honek 3.800 m²-ko zabalera izango du eta  energia aurreztea du helburuetako bat, “material naturalak erabiliz eta kristalezko paretak edukiz, argi artifizial gutxiago erabili dadin”.

Urbelan S.A. eraikitzailea ari da lanaz arduratzen. Barronek dioenez lan hori “ez da lan erraza, ez baita aire librean egindako lana”. Areto Nagusiaren azpian egiten ari baitira obrak eta horregatik “aurretik dauden estrukturak eta instalazioak errespetatu behar dira, erreforma baten antza handiagoa du".  du”. 

 Barronen hitzetan, lanak erritmo horretan jarraituz gero, azaroa eta abendua akaberetan zentratzeko erabiliko dituzte. Oraindik ez dago jakiterik kargu politikorik agertuko den inauguraziora, hauteskundeak aurretik baitira.

 

 

 

Zabalkuntzaren fatxada berria eta logoa

 

Hogeigarren urteurrena bete da EHUko kontratatuen baldintzak hobetzeko matxinada hasi zenetik

Heidi OTADUY

Hogei urte igaro dira jada Euskal Herriko Unibertsitateko funtzionario ez ziren irakasleak baldintza hobeak eskatzen hasi zirenetik. 1992an, ehun bat unibertsitateko irakasle kontratatu kaleratu zituzten. Hasieran, 600 bat pertsona agertu ziren haien eskubideen alde borrokatuz. Orain, ordea, gose grebak, mobilizazioak, epaiketak, kartzelaratzeak... igaro ondoren, hiru pertsona soilik mantentzen dira tinko.


Hogei urte pasa dira 1992an EHUko funtzionario ez ziren irakasleak lan baldintza duinak lortzeko mugitzen hasi zirenetik. Hasieran, kontzientziatuenak kaleratu zituzten. Hala ere, zazpi hilabetetan zehar dirurik irabazi gabe klaseak ematen jarraitu zuten, eskola orduak greba eta manifestaldiekin tartekatuz. Lege berri bat sortzea nahi zuten, Euskal Herriko kontratatuek funtzionarioek bezalako baldintzak eduki ahal izateko. Hasieran epaile batzuk arrazoia eman zieten. Baina, EHUk kasua auzitegira aurkeztu zuenean, unibertsitatean kontraturik ezin zela egon adierazi zuten epaileek. 2004an Iztueta Legea sortu zenean, sei pertsonek bakarrik jarraitu zuten borroka horretan.

Orain, hiru pertsona baino ez dira geratzen. 1998an idatzitako liburu baten azala pankarta batean dute, eta egunero egoten dira pankarta hori eusten Leioako Campusean. Hiru gauza eskatzen dituzte: antzinatasun-eskubideak izatea, zor zaizkien ordainketak gauzatzea eta geratzen diren hirurak onartzea. "Bukaera axolagabeena da, garrantzitsuena orain arte lortu dugun guztia da", adierazi du Jose Luis Herrero EHUko irakasle ohiak.